1Ki 19 | NdeIBE | STEP | U-Ahabi wasetshela uJezebeli ngakho konke okwakwenziwe ngu-Elija kanye lokuthi wababulala njani abaphrofethi ngenkemba.

1 Kings 19

U-Elija Ubalekela eHorebi

1 U-Ahabi wasetshela uJezebeli ngakho konke okwakwenziwe ngu-Elija kanye lokuthi wababulala njani abaphrofethi ngenkemba. 2 Ngalokho uJezebeli wathumela isithunywa ku-Elija ukuthi siyekuthi, “Onkulunkulu kabangihlanekele ngokwengezelelweyo nxa ngingakubulalanga kuze kube kusasa, njengoba usubulele abaphrofethi.”

3 U-Elija wasesesaba, wasuka wabaleka, wayafika eBherishebha yakoJuda, wasetshiya khona inceku yakhe. 4 Yena wahamba okwelanga elilodwa engena enkangala. Wafumana khona isihlahla, wahlala ngaphansi kwaso emthunzini, wakhulekela ukuthi ngabe uyafa wathi, “Kwanele, Jehova, susa ukuphila kwami ngoba angingcono kulabokhokho.”

5 Wasecambalala elala ngaphansi kwesihlahla wajunywa yibuthongo. Khonokho ingilosi yamthinta yathi kuye, “Vuka udle.” 6 Wathalaza, lakanye wabona ngemakhanda nantiyana iqebelengwana lisatshisa emalahleni elaliphekwe kuwo, kanye lenkezo eyayilamanzi okunatha. Wadla njalo wanatha, waphinda walala.

7 Ingilosi kaJehova yaphinda yabuya okwesibili yamthinta, yathi kuye, “Vuka udle, ngoba uhambo lude luzakukhulela.” 8 Ngakho wavuka, wadla njalo wehlisa ngamanzi. Eseqiniswe yilokhokudla wahamba izinsuku ezingamatshumi amane lobusuku obungamatshumi amane waze wayafika eHorebi intaba kaNkulunkulu. 9 Eselapho wangena ebhalwini walala.

UJehova Uzibonakalisa ku-Elija

Ngakho ilizwi likaJehova lafika kuye lisithi, “Kanti wenzani khonapha, Elija?”

10 Yena waphendula wathi, “Bengikutshisekela kakhulu, wena Jehova, Nkulunkulu wamabandla, ngoba abantu bako-Israyeli basephule isivumelwano sakho, badiliza ama-alithare akho, babulala abaphrofethi bakho ngenkemba; yimi ngedwa esengisele, kodwa bayangizingela badinga ukungibulala.”

11 UJehova wathi kuye, “Hamba uyekuma phezu kwentaba phambi kukaJehova ngoba uJehova uzadlula khona.” Kwaba lomoya owawuvunguza ngamandla udabula izintaba uqhekeza lamatshe phambi kukaJehova, kodwa uJehova wayengekho kulesosiphepho. Kwedlula isiphepho kweza ukuzamazama komhlaba kodwa uJehova wayengekho kulokhokuzamazama. 12 Kwedlula ukuzamazama komhlaba kwaqhamuka umlilo, kodwa uJehova wayengekho kulowomlilo. Ngemva komlilo kwezwakala ilizwi elipholileyo linyenyeza. 13 U-Elija uthe elizwa, wadonsa isambatho sakhe wamboza ubuso bakhe wasuka wayakuma entubeni yobhalu. Khonokho ilizwi lathi kuye, “Wenzani khonapha, Elija?”

14 Yena wathi, “Ngibe ngitshisekela uJehova uNkulunkulu uSomandla. Abako-Israyeli sebesalile isivumelwano sakho, badiliza amaalithare akho, babulala abaphrofethi bakho ngenkemba. Yimi ngedwa engiseleyo ngakho khathesi sebezama ukungibulala lami.”

15 UJehova wathi kuye, “Buyela ngayonale indlela oze ngayo, uye enkangala yaseDamaseko. Ekufikeni kwakho khonale, ugcobe uHazayeli abe yinkosi yase-Aramu. 16 Njalo, ugcobe loJehu indodana kaNimishi abe yinkosi yako-Israyeli, ubusugcoba u-Elisha indodana kaShafathi wase-Abeli-Mehola athathe isikhundla sakho sobuphrofethi. 17 UJehu uzabulala bonke abazaphepha kuleyonkemba kaHazayeli, njalo u-Elisha uzabulala labo abazasila kuleyonkemba kaJehu. 18 Kodwa ngizaphephisa abako-Israyeli abazinkulungwane eziyisikhombisa abangazange bakhothamele uBhali njalo abandebe zabo azizange zimange.

Ubizo luka-Elisha

19 Ngakho u-Elija wasuka lapho wafumana u-Elisha indodana kaShafathi. Wamfumana elima labanye ngenkabi emajogweni alitshumi lambili, yena etshayela ezejogwe letshumi lambili. UElija wasondela kuye wamembesa ngesambatho sakhe. 20 U-Elisha watshiya izinkabi zakhe walandela u-Elija. Wasesithi, “Ngivumela ngiyevalelisa ubaba lomama, ngibuye ngizehamba lawe.” U-Elija wamphendula wathi, “Buyela, kanti ngenzeni kuwe?”

21 Ngakho u-Elisha wehlukana laye wabuyela emuva. Wathatha izinkabi zejogwe lakhe wazihlaba. Wabasa umlilo ngezinto lezo ayelima ngazo ukuze ose inyama yazo wayinika abantu bayidla. Waselandela u-Elija waba yinceku yakhe.